புத்ராஜெயா, ஜூலை 09-
லஞ்ச ஊழல் மற்றும் முறைகேடுகள் போன்றவை நிகழ்ந்து இருப்பதாக கூறப்படும் மனித வள அமைச்சின் / மனித வள மேம்பாட்டுக்கழகமான HRD Corp. நிறுவனத்தின் தலைமை செயல்முறை அதிகாரி ஷாகுல் ஹமீத் ஷைக் டவுட் இடை நீக்கம் செய்யப்பட வேண்டும் என்று வலியுறுத்தப்பட்டுள்ளது.
HRD Corp. நிறுவனத்தின் தலைமை செயல்முறை அதிகாரி உடனடியாக இடை நீக்கம் செய்யப்பட வேண்டும் என்று பாசீர் கூடாங் பி கே ஆர் எம்.பி. ஹசன் கரீம், இன்று நாடாளுமன்றத்தில் இந்த கோரிக்கையை விடுத்துள்ளார்.
நாடாளுமன்ற விவாதத்தில் கலந்து கொண்ட ஹசன் கரீம், தொழிலாளர்களுக்கு பயிற்சி அளிப்பதற்காக மனித வள அமைச்சினால் தொடங்கப்பட்டுள்ள HRD Corp. தனது உன்னத நோக்கத்தை நிறைவேற்றத் தவறிவிட்டது என்றார்.
எனவே தற்போது HRD Corp. தலைமை செயல்முறை அதிகாரியாக பொறுப்பில் இருக்கும் ஷாகுல் ஹமீத் ஷைக் டவுட் இடை நீக்கம் செய்யப்படுவதை மனித வள அமைச்சர் ஸ்டீவன் சிம் உறுதி செய்ய வேண்டும் என்று ஹசன் கரீம் கேட்டுக்கொண்டார்.
சம்பந்தப்பட்ட தலைமை செயல்முறை அதிகாரி HRD Corp.பில் இரண்டு முக்கியப் பொறுப்பை வகித்து இருப்பது கண்டு பிடிக்கப்பட்டுள்ளது. இயக்குநர் வாரியத்திலும், முதலீட்டுக் குழுவிலும் அதே நபர் பொறுப்பில் இருந்துள்ளார் என்று ஹசன் கரீம் குறிப்பிட்டுள்ளார்.
