சிலாங்கூரில் வெள்ளப் பாதிப்புகளைத் தடுக்க, சுங்கை பூலோ மற்றும் சுங்கை டாமான்சாரா பகுதிகளில் மேற்கொள்ளப்படும் வெள்ளத் தடுப்புத் திட்டங்களை விரைவுபடுத்த பிரதமர் டத்தோ ஸ்ரீ அன்வார் இப்ராஹிம் உத்தரவிட்டுள்ளார்.
கிட்டத்தட்ட 700 மில்லியன் ரிங்கிட் செலவிலான இந்த இரண்டு திட்டங்களுக்கும் மத்திய அரசு ஏற்கெனவே ஒப்புதல் வழங்கியுள்ளது. ஆற்றுப் படுகைகளை ஆழப்படுத்துதல், ஆறுகளை அகலப்படுத்துதல், கூடுதல் நீர்த்தேக்கக் குளங்களை அமைத்தல் உள்ளிட்ட பணிகளைத் தாமதமின்றி மேற்கொள்ள அவர் அறிவுறுத்தியுள்ளார்.
கடும் மழையின் காரணமாக வெள்ளத்தில் பாதிக்கப்பட்ட நிலையில் சுங்கை பூலோ, கம்போங் மெலாயு சுபாங்கில் உள்ள டேவான் சியாந்தான் வெள்ள நிவாரண மையத்தில் தங்கியிருப்பவர்களை இன்று நேரில் சென்று சந்தித்தப் பின்னர் செய்தியாளர்களிடம் பேசியபோது பிரதமர் இதனைத் தெரிவித்தார்.
சம்பந்தப்பட்ட பகுதிகளில் ஏற்கெனவே இரண்டு முதல் மூன்று முறை வெள்ளம் ஏற்பட்டுள்ளதால், விரிவான தடுப்பு நடவடிக்கைகள் அவசியம் என்றும் அவர் வலியுறுத்தினார்.
இதற்கிடையே, மத்திய அரசின் வெள்ளத் தடுப்புத் திட்டங்களின் முன்னேற்ற அறிக்கையை வரும் வெள்ளிக்கிழமை பெறவுள்ளதாகவும், சிலாங்கூர் மந்திரி பெசார் டத்தோ ஸ்ரீ அமிருடின் ஷாரி மாநிலத் திட்டங்கள் குறித்த அறிக்கையைச் சமர்ப்பிக்கவுள்ளதாகவும் அன்வார் தெரிவித்தார்.
