மங்கோலியப் பெண் அல்தான்துயா ஷாரிபு கொலை வழக்கில் உண்மையை வெளிக்கொணர, குற்றவாளி சிருல் அஸார் உமாரை ஆஸ்திரேலியாவிலிருந்து மலேசியாவுக்குக் கொண்டுவர அரசாங்கம் துணிச்சலுடன் செயல்பட வேண்டும் என்று முன்னாள் சட்டத்துறை தலைவர் தோமி தோமஸ் வலியுறுத்தியுள்ளார்.
சிருலுக்குத் திரும்பியதும் மரண தண்டனை விதிக்கப்படாது என்று ஆஸ்திரேலியாவுக்கு மலேசியா உறுதியளித்தால், அவரை நாடு கடத்துவதற்கான நடவடிக்கையை அரை மணி நேரத்தில் தொடங்கிவிடலாம் என்றும் அவர் கூறியுள்ளார்.
அல் ஜஸீரா ஒளிபரப்பிய மர்டர் இன் மலேசியா-ஜஸ்திஸ் ஃபோர் அல்தான்துயா என்ற ஆவணப்படத்தில் பேசிய தோமி தோமஸ் மற்றும் அல்தான்துயா குடும்பத்தின் வழக்கறிஞர் சங்கீட் கவுர் டியோ ஆகியோர், சிருலும் அவரது கூட்டாளி அஸிலா ஹட்ரியும் அளித்த சட்டப்பூர்வ வாக்குமூலங்களில் உள்ள கூற்றுகள் விசாரிக்கப்பட வேண்டும் என வலியுறுத்தினர்.
2006ஆம் ஆண்டு கொலை செய்யப்பட்ட அல்தான்துயா வழக்கில் இன்னும் விடை கிடைக்காத கேள்விகள் இருப்பதாகவும், சிருலின் வாக்குமூலத்தில் கூறப்பட்டுள்ள தகவல்கள் உண்மையா என்பதை அதிகாரிகள் விசாரிக்க வேண்டும் என்றும் அவர்கள் தெரிவித்தனர்.
