இந்தோனேசியப் பெண் கடத்தல், ஒன்பது பேர் மீது குற்றச்சாட்டு

இந்தோனேசிய மாதுவை பிணைப்பணம் கோரி கடத்திச் சென்றதாக ஒன்பது ஆடவர்கள், பினாங்கு, ஜார்ஜ்டவுன் மாஜிஸ்திரேட் நீதிமன்றத்தில் இன்று குற்றஞ்சாட்டப்பட்டனர்.

சி. யோகநாதன் உட்பட 29 க்கும் 41 க்கும் இடைப்பட்ட வயதுடைய இந்த ஒன்பது பேரும் கடந்த செப்டம்பர் 7 ஆம் தேதி காலை 7 மணியளவில் ஜார்ஜ்டவுன், பாயா டெருபோங், பங்சாபுரி ஸ்ரீ அமன் என்ற இடத்தில் உள்ள ஓர் அடுக்குமாடி வீட்டில் 36 வயது இந்தோனேசிய மாதுவை கடத்திவைத்துக் கொண்டு 5 லட்சத்து 40 ஆயிரம் வெள்ளியை பிணைப்பணமாக கோரியதாக குற்றஞ்சாட்டப்பட்டுள்ளனர்.

குற்றவாளி என்று நிரூபிக்கப்பட்டால் கூடிய பட்சம் 40 ஆண்டு சிறைத் தண்டனை விதிக்க வகை செய்யும் சட்டத்தின் கீழ் ஒன்பது பேரும் குற்றஞ்சாட்டப்பட்டுள்ளனர்.