மலேசிய தேசியப் பல்கலைக்கழகமான யுகேஎம்மில் உள்ளூர் மாணவர்களை விட அனைத்துலக மாணவர்களின் எண்ணிக்கை 5:1 என்ற விகிதத்தில் அதிகமாக இருப்பதாக சமூக ஊடகங்களில் பரவி வரும் தகவல் முற்றிலும் உண்மையல்ல என்று பல்கலைக்கழக நிர்வாகம் மறுத்துள்ளது.
தற்போது பல்கலைக்கழகத்தில் மொத்தம் 46,151 மாணவர்கள் பயின்று வரும் வேளையில், அவர்களில் 3,917 பேர் மட்டுமே அனைத்துலக இளங்கலை மாணவர்கள் என்று யுகேஎம் அதிகாரப்பூர்வமாக விளக்கமளித்துள்ளது. இது மொத்த மாணவர் எண்ணிக்கையில் வெறும் 8 விழுக்காடு மட்டுமே ஆகும். இதன் மூலம், பரப்பப்படும் 5:1 என்ற விகிதம் தவறு என்றும், உண்மையான விகிதம் தோராயமாக 1:12 என்றும் தெளிவுபடுத்தப்பட்டுள்ளது.
பல்கலைக்கழகத்தின் நற்பெயரைக் கெடுக்கும் வகையில் இதுபோன்ற பொய்த் தகவல்களைப் பரப்புவோர் மீது சட்டப்பூர்வ நடவடிக்கை எடுக்கத் தயங்கப்போவதில்லை என எச்சரித்துள்ள நிர்வாகம், அனைத்துலக மாணவர்களின் சேர்க்கை முறையாகக் கட்டுப்படுத்தப்பட்டு, உள்ளூர் மாணவர்களுக்கான கல்வி வாய்ப்புகளுக்கே எப்போதும் முன்னுரிமை வழங்கப்படும் என்றும் உறுதியளித்துள்ளது.
