2027ஆம் ஆண்டு பட்ஜெட்டில் இளைஞர்களுக்காக சிறப்பு நிதி ஒதுக்கீடு அறிவிக்கப்படலாம் என்று பிரதமர் டத்தோ ஸ்ரீ அன்வார் இப்ராஹிம் கோடி காட்டியுள்ளார்.
கோலாலம்பூர் மாநாட்டு மையத்தில் இன்று நடைபெற்ற 2026 ஆம் ஆண்டு இளையோர் பொருளாதார பயிலரங்கை தொடக்கி வைத்து உரையாற்றிய அன்வார், கல்விச் செலவுகள் மற்றும் குறைந்த வருமானக் குடும்பங்களைச் சேர்ந்த மாணவர்களின் தேவைகள் குறித்து இளைஞர்கள் முன்வைத்துள்ள கோரிக்கைகள் கவனத்தில் கொள்ளப்பட்டுள்ளதாகக் கூறினார்.
“சில பல்கலைக்கழக மாணவர்கள் படிக்க விரும்புகிறோம், ஆனால் பசியுடன் இருக்கிறோம் என்கின்றனர். இது குறித்து கவனம் செலுத்தப்படும். பட்ஜெட் தாக்கல் செய்யும்போது அறிவிப்பேன்,” என்றார்.
வசதியில்லாத மாணவர்கள் கல்விக்காகக் கடன் வாங்கும் நிலை ஏற்படுவதைத் தவிர்க்க வேண்டும் என்றும் அன்வார் தெரிவித்தார்.
2027ஆம் ஆண்டு பட்ஜெட் அக்டோபர் 9ஆம் தேதி நாடாளுமன்றத்தில் தாக்கல் செய்யப்படவுள்ளது.
