கடந்த மே 24 முதல் காணாமல் போன மலையேற்ற வீராங்கனை ஜஸ்லிந்தா சலுடினைத் தேடும் பணியைத் தொடர்வதா அல்லது கைவிடுவதா என்பது குறித்த இறுதி முடிவு நாளை எடுக்கப்படும் என பேராக் தீயணைப்பு மற்றும் மீட்புத் துறை தெரிவித்துள்ளது.
இதுகுறித்து தப்பா மாவட்ட போலீஸ் தலைமையகத்தில் நாளை மதியம் 2 மணிக்கு ஒருங்கிணைப்புக் கூட்டம் நடைபெறவுள்ளது. கடினமான நிலப்பரப்பு மற்றும் கணிக்க முடியாத வானிலை காரணமாக இந்த மீட்புப் பணி 10-வது நாளாக இன்றும் கடுமையாகப் பாதிக்கப்பட்டுள்ளது.
கடந்த மே 30 ஆம் தேதி கிடைத்த கேமரா பதிவில், ஜஸ்லிந்தா 'கெம் சுகானேகா' நோக்கிச் சென்றது தெரியவந்தது. தற்போது, உள்ளூர் ஓராங் அஸ்லி தடமறிபவர்கள் உட்பட 32 மீட்புப் பணியாளர்கள் தாப்பாவில் உள்ள அடர்ந்த காட்டுப் பகுதியில் தீவிரமாகத் தேடி வருகின்றனர். அடர்ந்த மேகமூட்டம் மற்றும் பலத்த காற்று மீட்புப் பணிகளுக்குப் பெரும் சவாலாக உள்ளதாக அதிகாரிகள் தெரிவித்துள்ளனர்.
