சுங்கை பூலோ நாடாளுமன்றத் தொகுதியில் அண்மையில் ஏற்பட்ட வெள்ளத்தால் பாதிக்கப்பட்ட சுமார் 1,500 குடும்பங்களுக்கு ஏறக்குறைய ஒரு மில்லியன் ரிங்கிட் மதிப்பிலான நிவாரண உதவிகள் வழங்கப்பட்டுள்ளன.
மனிதவள அமைச்சர் டத்தோ ஶ்ரீ ரமணன் ராமகிருஷ்ணன் தலைமையில் சுங்கை பூலோவில் நடைபெற்ற இந்த நிகழ்ச்சியில் வெள்ளத்தில் பாதிக்கப்பட்ட மக்களை நேரில் சந்தித்து, உதவிப் பொருட்களை வழங்கினார். பல்வேறு இனங்கள், மதங்கள், மொழிகள், கலாசாரங்களை நாம் கொண்டிருந்தாலும், வெள்ளம் போன்ற இடர்களை சந்திக்கும் போது, பாதிக்கப்பட்டவர்களுக்கு உதவுவதில் மலேசியர்கள் அனைவரும் மனிதநேயத்தாலும் பரஸ்பர மரியாதையாலும் ஒன்றிணைய வேண்டும் என்று வலியுறுத்தினார்.
ஒருவரையொருவர் மதித்து, அன்புடன் பழகும் குடும்ப உணர்வுதான் மலேசியாவின் பலம் என்றும், அந்த ஒற்றுமையே நாட்டின் எதிர்கால வெற்றிக்கு அடிப்படை என்றும் அவர் குறிப்பிட்டார்.
மனிதவள அமைச்சின் கீழ் செயல்படும் எச்ஆர்டி கோர்ப் அமைப்பு, 'சந்துனி காசே மடானி’ திட்டத்தின் வழியாக வெள்ளத்தால் பாதிக்கப்பட்ட குடும்பங்களுக்கு அத்தியாவசியப் பொருட்களை வழங்கியது. மின்சார அடுப்பு, எரிவாயு அடுப்பு, அரிசி சமைக்கும் சாதனம், மின்சாரக் கெண்டி உள்ளிட்ட வீட்டு உபயோகப் பொருட்களும் எரிவாயு கலன்களும் இதில் அடங்கும்.
கம்போங் மெலாயு சுபாங், குபு காஜா, பாயா ஜெராஸ் உள்ளிட்ட ஏழு பகுதிகளைச் சேர்ந்த குடும்பங்கள் இந்த உதவியால் பயனடைந்துள்ளன. வெள்ளத்தில் பாதிக்கப்பட்டு, தங்களை பதிவு செய்து கொண்ட மக்களுக்கு தலா 2,500 ரிங்கிட் வழங்குவதற்கு பிரதமர் டத்தோ ஸ்ரீ அன்வார் இப்ராஹிம் நிதி ஒதுக்கியிருப்பதாக டத்தோ ஸ்ரீ ரமணன் விளக்கினார்.
இத்தகைய உதவி திட்டத்தை முன்னெடுத்த எச்ஆர்டி கோர்ப், அதன் தலைமை செயல்முறை அதிகாரி டத்தோ முஹமட் ஷாமிர் அப்துல் அஸிஸ் மற்றும் வெள்ளத்தில் பாதிக்கப்பட்டவர்களுக்கு உதவிய கிராமத் தலைவர்கள், போலீஸ் துறை, பொது தற்காப்பு படையினர் அனைவருக்கும் சுங்கை பூலோ நாடாளுமன்ற உறுப்பினர் என்ற முறையில் டத்தோ ஸ்ரீ ரமணன் தமது நன்றியைத் தெரிவித்துக் கொண்டார்.
