மலேசியா ஒவ்வொரு மாதமும் ஆயிரக்கணக்கான இணையவழித் தாக்குதல் முயற்சிகளை எதிர்கொண்டு வருவதாகப் பிரதமர் டத்தோ ஸ்ரீ அன்வார் இப்ராஹிம் தெரிவித்துள்ளார்.
இன்றைய தேசியப் பாதுகாப்பு அச்சுறுத்தல்கள் வழக்கமான ராணுவத் தாக்குதல்களுடன் நின்றுவிடவில்லை என்றும், இணையவழித் தாக்குதல்கள், கணினி அமைப்புகளுக்குள் ஊடுருவுதல் மற்றும் பயங்கரவாதக் குழுக்களின் நடமாட்டம் ஆகியவையும் முக்கியச் சவால்களாக உருவெடுத்துள்ளதாகவும் அவர் குறிப்பிட்டார்.
இதனை எதிர்கொள்ளும் வகையில், ஆயுதப்படைகளின் உயர்மட்டத் தலைவர்களுடன் கடந்த வாரம் பேச்சுவார்த்தை நடத்தி, இணையப் பாதுகாப்புப் பிரிவை வலுப்படுத்துவது குறித்து ஆலோசித்ததாக அவர் கூறினார்.
கோலாலம்பூரில் உள்ள 515ஆவது பிராந்திய ராணுவப் படை முகாமில், தேசிய சேவைப் பயிற்சித் திட்டமான பிஎல்கேஎன் 3.0 இளைஞர்களுடனான சந்திப்பு நிகழ்ச்சியில் பேசும்போது பிரதமர் இதனைத் தெரிவித்தார்.
மேலும், நவீன தொழில்நுட்ப வளர்ச்சிக்கு ஏற்ப ட்ரோன் உள்ளிட்ட புதிய பாதுகாப்பு முறைகளிலும் மலேசியா கூடுதல் கவனம் செலுத்த வேண்டும் என்றும் அவர் வலியுறுத்தினார்.
