ஜோகூர் பாரு, நவம்பர்.30-
ஜோகூர், தாமான் தம்போய் இண்டா பகுதியில் நடத்தப்பட்ட அதிரடிச் சோதனையில், பல்வேறு துறைகளில் பணிபுரிந்த 92 வெளிநாட்டவர்கள் கைது செய்யப்பட்டதாக ஜோகூர் குடிநுழைவுத் துறை இயக்குநர் டத்தோ முகமட் ருஸ்டி முகமட் டாருஸ் அறிவித்தார். கடந்த வெள்ளிக்கிழமை மாலை 4 மணியளவில் தையல் கடைகள், அழகு நிலையங்கள், உணவங்கள் உட்படப் பல வணிக வளாகங்களில் ஒரே நேரத்தில் இந்தச் சோதனை மேற்கொள்ளப்பட்டது.
கைது செய்யப்பட்டவர்களில் 19 இந்திய ஆண்கள், 19 மியான்மார் ஆண்கள், 4 இந்தியப் பெண்கள் உட்படப் பலர் அடங்குவர். இவர்கள் பல்வேறு விதிமீறல்களில் ஈடுபட்டிருப்பது ஆரம்பக் கட்ட விசாரணையில் தெரிய வந்துள்ளது. பிடிபட்ட அனைவரும் மேலதிக விசாரணைக்காகச் செத்தியா டுரோப்பிக்காவில் உள்ள குடிநுழைவுத் தடுப்புக் காவல் மையத்தில் வைக்கப்பட்டுள்ளனர்.
