சிலாங்கூர் இளவரசர் ராஜா மூடாவின் தனிப்பட்ட பாதுகாவலர் என ஆள்மாறாட்டம் செய்து, நிலம் மற்றும் சொகுசு கார்கள் தொடர்பான பேரங்களின் மூலம் பொதுமக்களை ஏமாற்றி பணம் பெற முயன்றதாகக் கூறப்படும் சம்பவம் குறித்து போலீஸ் விசாரணை நடத்த சிலாங்கூர் அரண்மனை வலியுறுத்தியுள்ளது.
சிலாங்கூர் சுல்தானின் அலுவலகம் வெளியிட்ட அறிக்கையில், இந்த விவகாரத்தைத் தீவிரமாகக் கருதுவதாகவும், முழுமையான, நியாயமான, வெளிப்படையான விசாரணைக்காக போலீசாரிடம் ஒப்படைத்துள்ளதாகவும் தெரிவிக்கப்பட்டுள்ளது. இந்தச் சம்பவத்தில் தொடர்புடையவர்கள் எனக் கண்டறியப்படும் எவருக்கும் அரண்மனை பாதுகாப்பு வழங்காது என்றும் குறிப்பிடப்பட்டுள்ளது.
மேலும், அரச குடும்பத்துடன் தொடர்பு இருப்பதாகக் கூறும் நபர்களுடன் எந்தவொரு பணப் பரிவர்த்தனையிலும் ஈடுபடுவதற்கு முன்பு, அரண்மனை நிர்வாகத்திடம் அவர்களின் அடையாளத்தையும் கூற்றுகளின் உண்மைத்தன்மையையும் உறுதிப்படுத்திக் கொள்ளுமாறு பொதுமக்களுக்கு அறிவுறுத்தப்பட்டுள்ளது.
