அம்பாங், கம்போங் பாரு அம்பாங், ஜாலான் மெர்டேக்காவில் உள்ள கோவில் வளாகத்தில் இரு குழுக்களுக்கு இடையே ஏற்பட்ட மோதல் தொடர்பாக, 15 முதல் 20 வயதுக்குட்பட்ட 13 இளைஞர்களைப் போலீசார் கைது செய்துள்ளனர்.
இன்று திங்கட்கிழமை நள்ளிரவு 12.01 மணியளவில் நிகழ்ந்ததாக நம்பப்படும் இந்த மோதலை, பணியிலிருந்த மக்கள் தற்காப்புப் படையினர் தலையிட்டு கட்டுப்படுத்தினர். சம்பவத்தில் பயன்படுத்தப்பட்டதாக நம்பப்படும் இரும்புத் தடிக்கம்பி, பேஸ்பால் மட்டை ஆகியவற்றையும் அவர்கள் கைப்பற்றினர்.
கோவில் நிர்வாகம், மோதலில் ஈடுபட்ட 13 பேரையும் கைப்பற்றப்பட்ட பொருட்களையும் போலீசாரிடம் ஒப்படைத்தது. அம்பாங் ஜெயா மாவட்ட போலீஸ் தலைவர் ஏசிபி கைருல் அனுவார் காலிட் கூறுகையில், இந்தச் சம்பவம் தொடர்பாகக் குற்றவியல் சட்டத்தின் 148ஆவது பிரிவின் கீழ் விசாரணை நடைபெறுவதாகத் தெரிவித்தார்.
இளைஞர்கள் மோதல் மற்றும் வன்முறையில் ஈடுபடுவதைத் தவிர்க்க வேண்டும் என்றும், பெற்றோர் தங்கள் பிள்ளைகளின் சமூக நடவடிக்கைகளைக் கண்காணிக்க வேண்டும் என்றும் அவர் அறிவுறுத்தினார்.
