பாஸ் கட்சியை விட அம்னோ தான் துரோகத்திற்கு அதிகம் பெயர் பெற்றது என பாஸ் தலைவர் அப்துல் ஹாடி அவாங் தெரிவித்துள்ளார்.
கடந்த வாரம் அம்னோ தலைவர் அகமட் ஜாஹிட் ஹமீடி வெளியிட்ட கருத்துக்கு பதிலடி கொடுக்கும் விதமாக இன்று கருத்துத் தெரிவித்துள்ள ஹாடி அவாங், அம்னோவானது, முன்பு பாஸ் கட்சி மீது உள்நாட்டு பாதுகாப்புச் சட்டமான ISA-ஐப் பயன்படுத்தியதாக குற்றம்சாட்டினார்.
ஆரம்பத்தில் அச்சட்டம் கம்யூனிஸ்ட் அச்சுறுத்தலை எதிர்கொள்ள மட்டுமே பயன்படுத்தப்பட வேண்டும் என்ற நோக்கம் இருந்ததாகவும் அவர் குறிப்பிட்டுள்ளார்.
மேலும், இந்த ‘துரோக மரபணு’ -வானது பாஸ் கட்சியில் இல்லை என்றும், அம்னோவில் தான் உள்ளது என்றும் ஹாடி தெரிவித்துள்ளார்.
மலாய் மக்கள் இந்த சம்பவத்தை ஒருபோதும் மறக்கமாட்டார்கள் என்று ஹாடி தமது “மிண்டா பிரெசிடென் பாஸ்” கட்டுரையில் தெரிவித்துள்ளார்.
கடந்த மே 7-ஆம் தேதி, பாஸ் கட்சி குறித்துக் கருத்துத் தெரிவித்த சாஹிட், பாஸ் தனது இதயத்திலிருந்து "துரோகத்தை" அகற்றினால் மட்டுமே, அதனுடனான ஒத்துழைப்பை மீண்டும் புதுப்பிப்பது குறித்து அம்னோ பரிசீலிக்கும் என்று தெரிவித்திருந்தார் என்பது குறிப்பிடத்தக்கது.
