நெகிரி செம்பிலான் மாநிலம் லாமான் செண்டாயான் குடியிருப்புப் பகுதியில் கருஞ்சிறுத்தை ஒன்று நடமாடுவதாகப் பொதுமக்கள் அளித்த புகாரைத் தொடர்ந்து, அதன் நடமாட்டத்தை உறுதிப்படுத்த வனவிலங்கு மற்றும் தேசியப் பூங்காக்கள் துறையான பெர்ஹிலிதான் கண்காணிப்புக் கேமராக்களைப் பொருத்தவுள்ளது.
இது குறித்து மாநில பெர்ஹிலிதான் இயக்குநர் வான் மாட் வான் ஹாருன் வெளியிட்டுள்ள தகவலில், புகாரின் உண்மைத்தன்மையை உறுதிப்படுத்திய பின்னரே அடுத்தகட்ட நடவடிக்கை எடுக்கப்படும் என்றார்.
இச்சம்பவம் குறித்து இன்று பிற்பகல் 2 மணியளவில் புகார் கிடைத்ததாகவும், சிறுத்தை நடமாட்டம் காணப்பட்டதாகக் கூறப்படும் இடமான காலா, நிரந்தர வனக் காப்பகத்திலிருந்து சுமார் 12 கிலோமீட்டர் தொலைவில் இருப்பதாகவும் அவர் தெரிவித்தார்.
இதனையடுத்து, இன்று மாலை அப்பகுதியில் கண்காணிப்புக் கேமராக்கள் பொருத்தப்படும் என்றும் கூறினார்.
இந்நிலையில், பொதுமக்கள் அந்த வனவிலங்கைக் கண்டால் எச்சரிக்கையுடன் இருக்க வேண்டும் என்றும், அதைத் தொந்தரவு செய்யவோ தாங்களாகவே பிடிக்க முயற்சிக்கவோ கூடாது என்றும் பெர்ஹிலிதான் அறிவுறுத்தியுள்ளது.








