உலு திராம், மே 18-
உலு திராம் போலீஸ் நிலையத்தில் நேற்று அதிகாலையில் நடந்த தாக்குதலில் இரண்டு போலீஸ்காரர்கள் கொல்லப்பட்டது தொடர்பில் Jemmah Islamia தீவிரவாத கும்பலுடன் தொடர்புடைய 46 பேர் விசாரணைக்கு அழைக்கப்பட்டுள்ளனர் என்று உள்துறை அமைச்சர் டத்தோ ஸ்ரீ சைபுதீன் நசுட்டியோன் இஸ்மாயில் தெரிவித்துள்ளார்.
இந்த தாக்குதலின் போது, போலீசாரால் சுட்டுக்கொல்லப்பட்ட J.I. கும்பலைச் சேர்ந்தவன் என்று நம்பப்படும் ஆடவனின் குடும்பத்தினர், J.I. சித்தாந்தத்தை கொண்டவர்கள் என்பது விசாரணையில் தெரியவந்துள்ளது என்று அமைச்சர் சைபுதீன் குறிப்பிட்டார்.
எனினும் இந்த தாக்குதலை அவன், தனியொரு நபராக மேற்கொண்டுள்ளான் என்பது கண்டறியப்பட்டுள்ளதாக அமைச்சர் விளக்கினார்.
சம்பந்தப்பட்ட ஆடவனும், அவனது குடும்ப உறுப்பினர்களும், ஓரிட மக்களுடன் பழக மாட்டார்கள் என்றும், தனியொரு குடும்பமாக மற்றவர்களுடன் எந்தவொரு தொடர்பின்றி வசித்து வந்ததாகவும் விசாரணையில் அம்பலமாகியுள்ளது என்று சைபுதீன் தெரிவித்தார்.
