நேபாளத்தில் மாயமான 54 மலேசியர்களின் குடும்பங்கள், அவர்களை இறந்தவர்களாகக் கருதுவதற்கான அதிகாரபூர்வக் கடிதங்களைப் பெற குறைந்தது 6 முதல் 9 மாதங்கள் வரை காத்திருக்க வேண்டியிருக்கும் என்று தெரிவிக்கப்பட்டுள்ளது.
நேபாளம் காத்திருப்புக் காலத்தை 12 ஆண்டுகளில் இருந்து 45 நாட்களாகக் குறைத்துள்ளபோதும், நடைமுறைச் சிக்கல்களால் தாமதம் ஏற்படலாம் என மலேசியா சோலிடரிடி ஃபேமிலிஸ் இன் ஹோப் அமைப்பின் பேச்சாளர் டாக்டர் ஆர். மணிவண்ணன் கூறினார்.
மனிதவள அமைச்சர் டத்தோ ஶ்ரீ ஆர். ரமணனைச் சந்தித்த பின்னர் செய்தியாளர்களிடம் பேசிய அவர், நேபாளத்தின் புதிய உத்தரவு அந்நாட்டு நாடாளுமன்றத்தின் ஒப்புதலைப் பெற்று அரசிதழில் வெளியிடப்பட வேண்டியுள்ளது என்றார்.
மலேசியாவில் அந்தக் கடிதத்தை ஏற்று இறப்புச் சான்றிதழ் வழங்க முடியுமா என்பதிலும் இன்னும் தெளிவு இல்லை என்றும், 54 வழக்குகளையும் தனித்தனியாகப் பரிசீலித்தால் மேலும் ஒன்று முதல் இரண்டு மாதங்கள் தாமதமாகலாம் என்றும் தெரிவித்தார்.
இறப்புச் சான்றிதழ் கிடைத்தாலும், மாயமானவர்களின் சேமநிதி உள்ளிட்ட சொத்துகளைப் பெறுவதற்கு வேட்பாளர் நியமனம் அல்லது நீதிமன்றத்தின் நிர்வாக அனுமதி தேவைப்படலாம். இந்த விவகாரங்கள் தொடர்பாக 52 கேள்விகளை வெளியுறவு அமைச்சின் வழியாக சட்டத்துறைத் தலைவரின் அலுவலகத்திடம் சமர்ப்பித்துள்ளதாகவும், இதுவரை பதில் கிடைக்கவில்லை என்றும் டாக்டர் ஆர். மணிவண்ணன் கூறினார்.
