நெகிரி செம்பிலான்-இன் பொதுப் போக்குவரத்து அமைப்பின் புதிய அடையாளமாக விளங்கவுள்ள சிரம்பான் சென்ட்ரல் திட்டமானது அடுத்த ஆண்டு மார்ச் மாதத்திற்குள் முழுமையாக நிறைவடையும் என போக்குவரத்து அமைச்சர் அந்தோனி லோக் தெரிவித்துள்ளார்.
சிரம்பான் கே.டி.எம்.பி நிலையத்தில் நடைபெற்ற பணி ஆய்வுக்குப் பிறகு செய்தியாளர்களிடம் பேசிய அவர், சுமார் RM100 மில்லியன் மதிப்பிலான இத்திட்டத்தின் மிகவும் சவாலான பணிகள் வெற்றிகரமாக நிறைவடைந்ததைத் தொடர்ந்து, தற்போது முக்கிய கட்டமைப்பு கட்டத்திற்குள் நுழைந்துள்ளதாகத் தெரிவித்தார்.
பழைய நிலையத்தின் பாரம்பரியக் கட்டிடக்கலையை நவீன வசதிகளுடன் ஒருங்கிணைத்து உருவாக்கப்பட்டுள்ள இந்த நிலையம், நாளொன்றுக்கு தொடக்கத்தில் 30,000 பயணிகளையும், எதிர்காலத்தில் 120,000 பயணிகள் வரையிலும் கையாளும் வகையில் வடிவமைக்கப்பட்டுள்ளது. இதேவேளையில், கிள்ளான் பள்ளத்தாக்கு இருவழி இரயில் பாதை இரண்டாம் கட்ட திட்டத்தின் பணிகள் தற்போது 55 சதவீதத்திற்கும் அதிகமான முன்னேற்றத்தைக் கண்டுள்ளதாகக் குறிப்பிட்ட அந்தோனி லோக், இது 2028-ஆம் ஆண்டுக்குள் நிறைவடையும் என்றும் தெரிவித்தார்.
