அமைச்சுகளுக்கிடையே கருத்துகள் அல்லது அணுகுமுறைகளில் வேறுபாடுகள் இருப்பது, அரசாங்கத்தில் பிளவு ஏற்பட்டுள்ளதைக் குறிக்காது என்று பிரதமர் டத்தோ ஸ்ரீ அன்வார் இப்ராஹிம் தெரிவித்துள்ளார்.
ஒவ்வோர் அமைச்சின் பொறுப்புகள், அதிகார வரம்புகள் மற்றும் முன்னுரிமைகளுக்கு ஏற்ப கொள்கைகள் குறித்து விவாதிக்கும்போது இத்தகைய வேறுபாடுகள் ஏற்படுவது இயல்பானது என்று அவர் கூறினார்.
மக்களின் நலன், நாட்டின் வளர்ச்சி முன்னுரிமைகள் மற்றும் அரசாங்கத்தின் நிதி ஆற்றலை அடிப்படையாகக் கொண்டு அமைச்சுகளுக்கிடையே முறையான ஒருங்கிணைப்பு உறுதிப்படுத்தப்படுவதாக நிதி அமைச்சருமான அன்வார் தெரிவித்தார்.
நாடாளுமன்ற இணையத்தளத்தில் இன்று வெளியிடப்பட்ட எழுத்துபூர்வ பதிலில் அவர் இதனைத் தெரிவித்தார். நிதி அமைச்சுக்கும் புறநகர், வட்டார மேம்பாட்டு அமைச்சுக்கும் இடையே முரண்பட்ட கருத்துகள் பொதுவெளியில் முன்வைக்கப்படுவதற்கான காரணம் குறித்து பெரிக்காத்தான் நேஷனல் கட்சியின் லாருட் நாடாளுமன்ற உறுப்பினர் டத்தோ ஸ்ரீ ஹம்ஸா ஸைனுடின் எழுப்பிய கேள்விக்கு அன்வார் பதிலளித்தார்.
