பினாங்கு மாநிலம் பாயா தெருபோங் பகுதியில் நிகழ்ந்த உயிரிழப்பை ஏற்படுத்திய நிலச்சரிவு குறித்து சுயேச்சையான விசாரணை நடத்த வேண்டும் என்று பல்வேறு அரசு சாரா அமைப்புகள் கோரிக்கை விடுத்துள்ளன.
கடந்த ஞாயிற்றுக்கிழமை தாமான் ஶ்ரீ ரம்பாய் பகுதியில் நிகழ்ந்த நிலச்சரிவில் 73 வயது மருத்துவர் ஒருவர் உயிரிழந்ததைத் தொடர்ந்து இந்தக் கோரிக்கை முன்வைக்கப்பட்டுள்ளது.
மலேசிய மண்ணின் தோழர் கழகத்தின் தலைவர் மீனாட்சி ராமன் தலைமையில் இந்தக் கோரிக்கையை முன்வைத்த அமைப்புகள், நிலச்சரிவுக்கான காரணம், மலைப்பகுதி மேம்பாட்டுத் திட்டங்களுக்கு வழங்கப்பட்ட அனுமதிகள் மற்றும் அதிகாரிகளின் அலட்சியம் குறித்து விசாரணை நடத்தப்பட வேண்டும் என்றன.
மேலும், மலைப்பகுதி மேம்பாட்டுக்கான கட்டுப்பாடுகளைத் தளர்த்தும் திட்டத்தைக் கைவிட வேண்டும் என்றும், இதுபோன்ற விபத்துகள் மீண்டும் நிகழாமல் தடுக்க வேண்டும் என்றும் வலியுறுத்தின.
பினாங்கு மாநில எதிர்க்கட்சித் தலைவர் முஹமட் ஃபௌஸி யுசோஃப்பும் இந்தக் கோரிக்கைக்கு ஆதரவு தெரிவித்துள்ளார்.
