நாட்டில் குடியுரிமையற்ற மற்றும் தத்தெடுக்கப்பட்ட குழந்தைகளின் உரிமைகள் தொடர்பான முக்கிய வழக்குகளில், முன்னாள் கூட்டரசு நீதிமன்ற நீதிபதி டான் ஸ்ரீ நளினி பத்மநாதன் ஆற்றிய பங்களிப்பிற்குத் தொடர்புத் துணை அமைச்சர் தியோ நீ சிங் தனது பாராட்டுகளைத் தெரிவித்துள்ளார்.
அண்மையில் டான் ஸ்ரீ நளினியை நேரில் சந்தித்த பிறகு தனது முகநூல் பக்கத்தில் அறிக்கை ஒன்றை வெளியிட்டுள்ள துணை அமைச்சர், "பாதிக்கப்பட்ட குழந்தைகளின் குடியுரிமை தொடர்பாக சிடிஇபி (CTEB) மற்றும் சிசிஎச் (CCH) ஆகிய முக்கிய வழக்குகளில் நீதிபதி நளினி வழங்கிய மாற்றுத் தீர்ப்புகளும், அவர் எடுத்த உறுதியான நிலைப்பாடும் பாராட்டுக்குரியவை" எனக் குறிப்பிட்டுள்ளார்.
மேலும், இந்தத் தீர்ப்புகள் உரிமைகளுக்காகப் போராடுபவர்களுக்குப் பெரும் உத்வேகத்தை அளித்துள்ளதோடு, நீதித்துறையின் மீதான மக்களின் நம்பிக்கையை வலுப்படுத்தியுள்ளதாகவும் அவர் கூறினார்.
அத்துடன், கடந்த ஜூன் மாதம் டான் ஸ்ரீ நளினி பத்மநாதன் 'மலேசிய ஊடக மன்றத்தின்' தலைவராக நியமிக்கப்பட்டுள்ளார் என்ற முக்கியத் தகவலையும் தியோ நீ சிங் அந்த அறிக்கையில் சுட்டிக் காட்டியுள்ளார்.
