ஷா ஆலாம், பெர்சியாரான் பெர்பன்டாரான் செக்ஷென் 14 இல் நடந்த காவல் துறை சோதனையில் இருந்து தப்பிக்க 21 வயது ஆடவர் மோட்டார் சைக்கிளில் சாலைப் போக்குவரத்து காவல் துறை அதிகாரியை மோதியதில் அவர் பலத்தக் காயங்களுக்கு உள்ளாகி ஷா ஆலாம் மருத்துவமனையில் சேர்க்கப்பட்டுள்ளார்.
நேற்று நள்ளிரவு 12.30 மணி அளவில் இச்சம்பவம் நேர்ந்தது. மோதிய ஆடவருக்கும் சில காயங்கள் ஏற்பட்ட நிலையில் அதே மருத்துவமனையில் சிகிச்சை பெற்றார்.
மோட்டார் சைக்கிளில் பக்க வாட்டில் இருக்கும் கண்ணாடி இல்லாதக் காரணத்தால், அந்தச் சோதனை நடவடிக்கையில் இருந்து தப்பித்துச் செல்ல வேண்டிய அவசியம் இல்லை. அது பெரிய தவறும் இல்லை என ஷா ஆலாம் சாலைப் போக்குவரத்து புலபாய்வு, அமலாக்கப் பிரிவின் தலைவர் டெப்புத்தி சுபெரிதென்டன் எஸ்எச் ரொஸ்லீ எஸ்எச் முஹமாட் நொரானி தெரிவித்தார்.
பதற்றத்தில் வேகமாக மோட்டார் சைக்கிளை செலுத்தியதால் இந்த ஆபத்து நேர்ந்துள்ளது எனக் கூறிய அவர், இந்த விவகாரம் குற்றவியல் சட்டம் 307 இன் படியும் சாலைப் போக்குவரத்துச் சட்டம் 1987 இன் படியும் விசாரிக்கப்பட இருப்பதாகத் தெரிவித்தார்.
