பேராக், மஞ்சோங்கில், 200 ரிங்கிட் பணத்திற்காக ஒருவரைக் கொலை செய்த இரு ஆடவர்களுக்கு விதிக்கப்பட்ட 35 ஆண்டுகள் சிறைத்தண்டனையை கூட்டரசு நீதிமன்றம் இன்று உறுதி செய்துள்ளது.
38 வயது எஸ். சந்தானம், 37 வயது ஆர். ரமேஷ் ஆகிய இருவரும், 2018ஆம் ஆண்டு அக்டோபரில் மஞ்சோங், செகாரி என்ற இடத்தில் கைவிடப்பட்ட சிமெண்ட் தொழிற்சாலையில் 48 வயது கே. முத்துக்குமார் என்பவரை கொலை செய்த குற்றத்திற்காகத் தண்டிக்கப்பட்டுள்ளனர்.
போதைப்பொருள் விற்பனையில் ஏற்பட்ட 200 ரிங்கிட் பணப் பற்றாக்குறையே இந்தக் கொலைக்குக் காரணம் என விசாரணையில் தெரிய வந்தது. முத்துக்குமாரைக் கட்டிப் போட்டு தாக்கியதுடன், வயிற்றுப் பகுதியில் 21 முறை கத்தியால் குத்தியதில் அவர் உயிரிழந்தார்.
இந்த வழக்கில் இருவருக்கும் விதிக்கப்பட்ட 35 ஆண்டுகள் சிறைத்தண்டனையுடன், தலா 12 பிரம்படிகளையும் கூட்டரசு நீதிமன்றம் உறுதி செய்தது. மூன்று நீதிபதிகள் அடங்கிய அமர்வு, அவர்களின் இறுதி மேல்முறையீட்டை ஒருமனதாக நிராகரித்தது.
