பேராக்கில் பிறந்து, ஐந்து மலேசியக் குடிமக்களுக்குத் தந்தையான 39 வயது வேல்முருகனுக்கு மலேசியக் குடியுரிமை வழங்கக் கோரிய மேல்முறையீட்டை மேல்முறையீட்டு நீதிமன்றம் தள்ளுபடி செய்துள்ளது.
டத்தோ அஸாஹாரி கமால் ரம்லி தலைமையிலான மூன்று நீதிபதிகள் குழு, அவரது தாயார் பாலம்மா, மலேசியக் குடிமகள் என்பதற்குப் போதிய ஆதாரங்கள் இல்லை என்றும், வேல்முருகன் வேறொரு நாட்டின் குடிமகனாகப் பிறக்கவில்லை என்பதையும் நிரூபிக்கத் தவறிவிட்டார் என்றும் தீர்ப்பளித்தது.
கடந்த 1987-ஆம் ஆண்டு பேராக், தஞ்சோங் மாலிம், உலு பெர்னாமில் உள்ள எஸ்காட் தோட்டத்தில் பிறந்த வேல்முருகனின் பிறப்பு, அவருக்கு 24 வயதான 2011-ஆம் ஆண்டில்தான் பதிவு செய்யப்பட்டது. தேசியப் பதிவுத் துறை அவரது குடியுரிமை நிலையைத் தெரியாதது எனப் பதிவு செய்திருந்தது. அவரது தாயாரின் குடியுரிமை நிலையும் உறுதிப்படுத்தப்படவில்லை.
தாயார் மலேசியாவில் பிறந்தாரா என்பது உள்ளிட்ட விவரங்களில் சாட்சிகளின் வாக்குமூலங்கள் முரண்பட்டதாக நீதிமன்றம் சுட்டிக் காட்டியது. மேலும், அவரது பெற்றோர் அவர் பிறந்தபோது சட்டப்படி திருமணம் செய்திருந்தார்களா என்பதற்கும் ஆதாரம் இல்லை எனக் குறிப்பிட்டது.
மலேசியாவில் பிறந்து வாழ்ந்ததையும், நல்லொழுக்கமுள்ளவர் என்பதையும் மட்டும் வைத்து குடியுரிமை வழங்க முடியாது என நீதிமன்றம் தெரிவித்தது. குடியுரிமை தொடர்பான அனைத்து முடிவுகளும் கூட்டரசு அரசியலமைப்பின் நிபந்தனைகளுக்கு உட்பட்டவை என்றும், இயல்புரிமை மூலம் குடியுரிமை பெறுவதற்கு மத்திய அரசிடம் தனியாக விண்ணப்பிக்க வேண்டும் என்றும் நீதிபதிகள் தெளிவுபடுத்தினர்.
