டாக்ஸி, வாடகைக் கார் மற்றும் பள்ளிப் பேருந்து ஓட்டுநர்களுக்கு தலா ஆயிரம் ரிங்கிட் ஒருமுறை உதவித்தொகை, வரும் புதன்கிழமை அக்டோபர் 14ஆம் தேதி முதல் கட்டம் கட்டமாக வழங்கப்படும் என்று போக்குவரத்து அமைச்சர் அந்தோணி லோக் அறிவித்துள்ளார்.
இதன் மூலம் சுமார் 38 ஆயிரம் டாக்ஸி மற்றும் வாடகைக் கார் ஓட்டுநர்களும், 15 ஆயிரம் பள்ளிப் பேருந்து ஓட்டுநர்களும் பயனடைவர். எச் வரிசை வாகனப் பதிவெண்கள் மூலம் கிடைத்த 91 மில்லியன் ரிங்கிட் வருவாயை ஓட்டுநர்களுக்குத் திருப்பி வழங்குவதாக அமைச்சர் தெரிவித்தார்.
தீபாவளிக்கு முன்பாக இந்த உதவித்தொகையைப் பெறுவதற்கு இந்து ஓட்டுநர்களுக்கு உதவ அரசாங்கம் விரும்புவதாகவும் அவர் கூறினார். இதற்கிடையில், கேடிஎம் பயணிகளுக்கான மாதம் 50 ரிங்கிட் கட்டணத்தில் 30 நாட்களுக்கு வரம்பற்ற பயணத்தை வழங்கும் மைகொமுட்டர்50 பயண அட்டை, அடுத்த ஆண்டு ஜனவரிக்குள் அறிமுகப்படுத்தப்படும் என்றும் அந்தோணி லோக் அறிவித்தார்.
