நாட்டில் நிலவும் புகைமூட்டத்தால் கற்றல் நடவடிக்கைகள் பாதிக்கப்படக்கூடும் என்பதால், மாணவர்கள் தங்களின் உடல்நலனில் கூடுதல் கவனம் செலுத்த வேண்டும் என்று கல்வி அமைச்சர் டத்தோ ஶ்ரீ ஃபாட்லீனா சீடேக் வலியுறுத்தியுள்ளார்.
புகைமூட்டம் மோசமடையும் பகுதிகளில் உடனடியாகத் தடுப்பு நடவடிக்கைகளை மேற்கொள்ளுமாறு, அனைத்து மாநிலக் கல்வித் துறைகள், மாவட்டக் கல்வி அலுவலகங்கள் மற்றும் கல்வி அமைச்சின் கீழ் இயங்கும் கல்விக்கழகங்களுக்கு அறிவுறுத்தப்பட்டுள்ளதாகவும் அவர் குறிப்பிட்டார்.
புகைமூட்டம் விரைவில் விலகி நிலைமை இயல்பு நிலைக்குத் திரும்பும் என நம்பிக்கை தெரிவித்த அவர், மாணவர்களின் உடல்நலம் மற்றும் பாதுகாப்பை உறுதிப்படுத்துவதில் பள்ளிகள் உரிய கவனம் செலுத்த வேண்டும் என்றும் வலியுறுத்தினார்.
