பேராக் மாநிலத்தில் அனைத்து இன மக்களிடையேயும் நிலவும் ஒற்றுமை மற்றும் நல்லிணக்கத்தை தொடர்ந்து பாதுகாக்க அனைத்து தரப்பினரும் ஒன்றிணைந்து செயல்பட வேண்டும் என்று மாநில ஆட்சிக்குழு உறுப்பினர் டத்தோ அ.சிவநேசன் வலியுறுத்தினார்.
பீடோர், டேவான் முஹிப்பாவில் நடைபெற்ற ஃபெஸ்டிவல் ஐடியா 2026 நிகழ்ச்சியைத் தொடக்கி வைத்து உரையாற்றியபோது அவர் இதனைத் தெரிவித்தார்.
சமூக ஊடகங்களில் இன உணர்வுகளைத் தூண்டும் கருத்துகள் பரப்பப்படுவதை புகார் கிடைக்கும் வரை காத்திருக்காமல், ஆரம்ப நிலையிலேயே கண்காணித்து போலீஸ் துறை உரிய நடவடிக்கை எடுக்க வேண்டும் என்றார்.
அதேவேளை, தேசிய ஒருமைப்பாடு மற்றும் ஒருங்கிணைப்புத் துறையின் மாவட்ட அதிகாரிகள், பிரச்சினை ஏற்பட்ட பின்னர் நடவடிக்கை எடுப்பதைவிட, சமூக நல்லிணக்கத்திற்கு அச்சுறுத்தலாக அமையும் விவகாரங்களை முன்கூட்டியே அடையாளம் கண்டு தடுக்க வேண்டும் என்றும் அவர் கேட்டுக் கொண்டார்.
பல்வேறு இனங்களுக்கு இடையில் புரிந்துணர்வும் ஒற்றுமையும் பேராக் மாநிலத்தின் பலம் என்றும், அதனை எந்தத் தரப்பினரும் சீர்குலைக்கக்கூடாது. ஒற்றுமையை வலியுறுத்துதே இந்நிகழ்வின் தலையாய நோக்கமாகும் என்றும் டத்தோ அ.சிவநேசன் வலியுறுத்தினார்.
ஒற்றுமையை வலியுறுத்தும் வகையில் பல்வேறு ஏஜென்சிகளின் ஒத்துழைப்புடன் நடத்தப்பட்ட இந்த ஃபெஸ்டிவல் ஐடியா நிகழ்ச்சியை பேராக் மாநிலத்தின் ஏனைய 12 மாவட்டங்களுக்கும் விரிவுபடுத்தத் திட்டமிடப்பட்டுள்ளதாக அவர் தெரிவித்தார்.
இதன் மூலம் பல்வேறு சமூகங்களுக்கு இடையில் ஒற்றுமையை உணர்வை மேலும் வலுப்படுத்த முடியும் என்று பேரா மாநிலத்தில் ஒற்றுமைத்துறைக்கு தலைமையேற்றுள்ள டத்தோ சிவநேசன் குறிப்பிட்டார்.
