கோலாலம்பூரில் நாளை வெள்ளிக்கிழமை பள்ளிகள் வழக்கம்போல் இயங்கும் என்று கோலாலம்பூர் கல்வித் துறை அறிவித்துள்ளது. எனினும், புகைமூட்டம் காரணமாக பள்ளிகளில் அனைத்து வெளிப்புற நடவடிக்கைகளுக்கும் தடை விதிக்கப்பட்டுள்ளது.
பள்ளிக்கு வரும் மாணவர்கள் முன்னெச்சரிக்கையாக முகக்கவசம் அணியுமாறு அறிவுறுத்தப்பட்டுள்ளனர். புகைமூட்டத்தால் தங்கள் பிள்ளைகளின் உடல்நலம் பாதிக்கப்படலாம் என்று கவலைப்படும் பெற்றோர், அவர்களைப் பள்ளிக்கு அனுப்பாமல் இருக்கலாம். ஆனால், இது குறித்து பள்ளிக்குத் தகவல் தெரிவிக்க வேண்டும் என்று கல்வித் துறை கேட்டுக் கொண்டுள்ளது.
மாணவர்கள் மற்றும் பள்ளிப் பணியாளர்களின் பாதுகாப்பு, உடல்நலம் மற்றும் நலனுக்கு முன்னுரிமை அளிக்கப்படுவதாகவும், புகைமூட்ட நிலவரம் தொடர்பான அதிகாரிகளின் அறிவுறுத்தல்களைப் பொதுமக்கள் பின்பற்ற வேண்டும் என்றும் கல்வித் துறை வலியுறுத்தியுள்ளது.
