போலீஸ் தடுப்புக் காவலில் இருந்த 40 வயது ஆடவர், மருத்துவமனையில் சிகிச்சை பெற்று வந்த நிலையில் அக்டோபர் 1ஆம் தேதி அதிகாலை உயிரிழந்தார்.
கோலாலம்பூர் போலீஸ் தலைவர் டத்தோ ஃபாடில் மார்சுஸ் வெளியிட்ட அறிக்கையின்படி, அந்த ஆடவர் தடுத்து வைக்கப்பட்டிருந்தபோது உடல்நலக் குறைவு காரணமாக கோலாலம்பூரில் உள்ள துவாங்கு முஹ்ரிஸ் தேசிய பல்கலைக்கழக மருத்துவமனையில் அனுமதிக்கப்பட்டிருந்தார்.
அவர் மீது குற்றவியல் சட்டத்தின் 457, 379ஆவது பிரிவுகளின் கீழ் இரண்டு குற்ற வழக்குகளும், ஆபத்தான போதைப்பொருள் சட்டத்தின் கீழ் ஒரு வழக்கும் விசாரிக்கப்பட்டு வந்தன. அவருக்கு 44 முந்தைய குற்றப் பதிவுகள் இருப்பதாகவும் போலீஸ் தெரிவித்துள்ளது.
இந்தச் சம்பவம் தடுப்புக் காவல் மரணமாக வகைப்படுத்தப்பட்டு, போலீஸ் நேர்மைக் கண்காணிப்புப் பிரிவின் கீழ் விசாரணை நடைபெறுகிறது. விசாரணைக்கு இடையூறு ஏற்படுத்தக்கூடிய ஊகங்களைத் தவிர்க்குமாறும் போலீஸ் பொதுமக்களைக் கேட்டுக் கொண்டுள்ளது.
