தலையில் ரத்தக்கட்டி ஏற்பட்டதைத் தொடர்ந்து செலாயாங் மருத்துவமனையில் சிகிச்சை பெற்று வரும் மக்கள் ஓசை பத்திரிகையின் மூத்த ஆசிரியர் பி.ஆர். ராஜனுக்கு, பிரதமர் டத்தோஸ்ரீ அன்வார் இப்ராஹிம் நிதியுதவி வழங்கியுள்ளார்.
தமது சார்பில் பிரதமர் அலுவலகத்தின் பல அதிகாரிகள் மருத்துவமனைக்குச் சென்று ராஜனைச் சந்தித்து, அவரது உடல்நிலை குறித்து விசாரித்ததுடன், அவருக்கும் அவரது குடும்பத்தினருக்கும் உதவும் வகையில் நிதியுதவியையும் வழங்கியதாக அன்வார் தெரிவித்தார்.
மேலும், ராஜன் விரைவில் முழுமையாகக் குணமடையவும், அவரது சிகிச்சை சுமுகமாக நடைபெறவும் பிரார்த்திப்பதாகவும், இந்தச் சவாலான காலகட்டத்தைக் கடந்து செல்ல அவரது குடும்பத்தினருக்கு மனவலிமை கிடைக்க வேண்டுமென விரும்புவதாகவும் அன்வார் தமது முகநூல் பதிவில் குறிப்பிட்டுள்ளார்.
வீட்டில் மயங்கிய நிலையில் கண்டறியப்பட்ட ராஜனுக்கு, பரிசோதனைகளில் தலையில் ரத்தக்குழாய் வெடித்திருப்பது உறுதி செய்யப்பட்டது. இதையடுத்து, ரத்தக்கட்டியை அகற்ற அறுவை சிகிச்சை மேற்கொள்ளப்பட்டது. தற்போது அவரது உடல்நிலை சீராக இருப்பதாகத் தெரிவிக்கப்பட்டுள்ளது.
