கல்வித் தகுதி, திறன் நிலைக்கு ஏற்ப தொழிலாளர்களுக்கு நியாயமான சம்பளம் கிடைப்பதை உறுதி செய்ய, ‘மாஸ்கோ’ எனப்படும் மலேசியத் தொழில் வகைப்பாட்டுத் தரநிலையின் அடிப்படையில் ஆரம்பச் சம்பள வழிகாட்டுதல்களை மனிதவள அமைச்சு தயாரித்து வருகிறது.
2027ஆம் ஆண்டு பட்ஜெட்டில் பட்டதாரிகளுக்கும் பகுதியளவு திறன் பெற்ற தொழிலாளர்களுக்கும் மாதம் 2,500 ரிங்கிட் ஆரம்ப அடிப்படைச் சம்பளக் கட்டமைப்பு அறிமுகப்படுத்தப்பட்டுள்ளதைத் தொடர்ந்து இந்த நடவடிக்கை எடுக்கப்படுவதாக, மனிதவள அமைச்சர் டத்தோ ஸ்ரீ ரமணன் ராமகிருஷ்ணன் தெரிவித்தார்.
இன்று புத்ராஜெயாவில் பெர்கேசோ கட்டடத்தில் நடைபெற்ற விளக்கக் கூட்டத்தில் பேசிய டத்தோ ஸ்ரீ ரமணன், சம்பள வழிகாட்டுதல்கள் 2027 ஜூன் மாதத்தில் புதிய குறைந்தபட்ச ஊதிய ஆணையுடன் வெளியிடப்படும் என்றார்.
மேலும், தொழிலாளர்களுக்குச் சம்பளம் வழங்குவதைக் கண்காணிக்க ‘இ-வேஜஸ்’ என்ற மின்னணு முறையை அறிமுகப்படுத்த அமைச்சு திட்டமிட்டு வருகிறது. சம்பளத் தாமதம், நிலுவை மற்றும் குறைந்தபட்ச ஊதியத்திற்குக் குறைவாகச் சம்பளம் வழங்குதல் போன்ற பிரச்சினைகளைக் கையாள இது உதவும்.
இதற்கிடையில், இந்தியர் சமூக உருமாற்றப் பிரிவான மித்ராவுக்கு 150 மில்லியன் ரிங்கிட் ஒதுக்கப்பட்டுள்ளதுடன், மோசமான நிலையில் உள்ள தமிழ்ப்பள்ளிகளைப் பராமரிக்க 50 மில்லியன் ரிங்கிட்டும் ஒதுக்கப்பட்டுள்ளது என்று அவர் குறிப்பிட்டார்.
