மலாக்கா மாநிலத்திலுள்ள 21 தமிழ்ப்பள்ளிகளின் கல்வி வசதிகளை மேம்படுத்த, மலேசிய இந்தியச் சமூக உருமாற்றப் பிரிவான மித்ரா மூலம் 7 லட்சத்து 55 ஆயிரத்து 390 ரிங்கிட் நிதி ஒதுக்கப்பட்டுள்ளது.
இந்த நிதி, பள்ளிகளுக்கான தளவாட உதவி, திறன்மிகு மின்னணுப் பலகைகள் மற்றும் கல்வி மேம்பாட்டுத் திட்டமான கல்வி மடானி ஆகியவற்றுக்குப் பயன்படுத்தப்படும் என மனிதவள அமைச்சர் டத்தோ ஶ்ரீ ஆர். ரமணன் தெரிவித்துள்ளார்.
மலாக்காவில் உள்ள லாடாங் ஜாசின் லாலாங் தமிழ்ப்பள்ளியில் இன்று மேற்கொள்ளப்பட்ட பணி நிமித்தமான வருகையின்போது டத்தோ ஸ்ரீ ரமணன் செய்தியாளர்களிடம் இதனைத் தெரிவித்தார்.
மாணவர்கள் நவீன தொழில்நுட்பம் மற்றும் இலக்கமுறைத் திறன்களைப் பெறுவதற்கான வாய்ப்புகளை மேம்படுத்துவதே இத்திட்டத்தின் நோக்கம் என்றும் அவர் குறிப்பிட்டார்.
இதற்கிடையில், மெடியா மூலியா நிறுவனத்தின் கீழ் இயங்கும் உத்துசான் மலேசியா மற்றும் கோஸ்மோ! நாளிதழ்களைச் சேர்ந்த வேலை பாதிக்கப்பட்ட 100 ஊழியர்களுக்கு, சமூகப் பாதுகாப்பு அமைப்பான பெர்கெசோ மூலம் ஆறு மாதங்கள் வரை நிதியுதவி வழங்கப்படும் என்றும் அவர் தெரிவித்தார்.
மேலும், மைஃபுயூச்சர்ஜாப்ஸ் (MYFutureJobs) வேலை வாய்ப்பு இணையத்தளத்தில் மலேசியர்களுக்காக சுமார் 4 லட்சம் வேலை வாய்ப்புகள் இருப்பதாகவும் ரமணன் கூறினார்.
