பேரா, தம்புன், கந்தான் நிலப்பகுதியில் விவசாயம் செய்து வரும் குடியானவர்களை வெளியேற்றும் நடவடிக்கையை தடுத்து நிறுத்தும் ஆட்சேப நடவடிக்கையில் ஈடுபட்டதற்காக கைது செய்யப்பட்டு, தடுப்புக்காவலில் வைக்கப்பட்ட மலேசிய சோஷலிச கட்சியான பி.எஸ்.எம் தலைவர் டாக்டர் மைக்கல் ஜெயக்குமார் உட்பட நால்வர் நேற்று இரவு விடுவிக்கப்பட்டனர்.
அந்த நால்வரிடம் போலீசார் வாக்குமூலம் பதிவு செய்தப்பின்னர் அவர்கள் விடுவிக்கப்பட்டனர். பி.எஸ்.எம் கட்சியின் செயற்குழு உறுப்பினர் ஆர். கார்த்திகேஸ், அக்கட்சியின் இளைஞர் பிரிவு பொறுப்பாளர் P. கேசவன், ஒரு விவசாயியான ஹோ பொன் டைன் ஆகியோர் கைது செய்யப்பட்டவர்களின் அடங்குவர்.
போலீசார் மற்றும் அரசு அதிகாரிகள் கடமையாற்றுவதிலிருந்து தடுத்து நிறுத்தி, அவர்களுக்கு இடையூறு விளைவித்தாக கூறி டாக்டர் மைக்கல் ஜெயக்குமார் உட்பட நால்வர் கைது செய்யப்பட்டனர். பேரா மாநில நிலம், சுரங்கம், கனிமவளத்துறை அலுவலகத்தின் முன் ஆட்சேப நடவடிக்கையில் ஈடுபட்ட போது அவர்களை போலீசார் கைது செய்தனர்.
