கோலாலம்பூரில், கடன் பெற்றதாகப் பொய்யாகக் குற்றஞ்சாட்டி, வெளிநாட்டுப் பெண் ஒருவரை நிர்வாணமாக்கி, காணொளி பதிவு செய்யக் கட்டாயப்படுத்தியதாக மிரட்டல் சம்பவம் ஒன்று பதிவாகியுள்ளது.
32 வயதுடைய அந்தப் பெண், கடன் பரிந்துரைக்கான தரகு ஏற்பாடு தொடர்பாகச் சந்தித்த ஆடவரால் மிரட்டப்பட்டதாக மசீச. பொது சேவைகள் மற்றும் புகார் பிரிவுத் தலைவர் டத்தோ ஶ்ரீ மைக்கல் சோங் தெரிவித்துள்ளார்.
கடந்த நவம்பர் 3ஆம் தேதி, அந்தப் பெண்ணின் பணியிட வாகன நிறுத்துமிடத்தில் நடைபெற்ற சந்திப்பின்போது, தாம் கடன் வாங்கியதாகக் கூறி 10 ஆயிரம் ரிங்கிட் செலுத்த வேண்டும் என அந்த ஆடவர் வலியுறுத்தியுள்ளார்.
பின்னர், பாலியல் உறவுக்கு இணங்க வேண்டும் அல்லது நிர்வாணக் காணொளியைப் பதிவு செய்து மூவாயிரம் ரிங்கிட் செலுத்த வேண்டும் என மிரட்டியதாகக் கூறப்படுகிறது.
இதனால் அச்சமடைந்த பெண், காணொளியைப் பதிவு செய்யக் கட்டாயப்படுத்தப்பட்டதுடன், பின்னர் போலீசில் புகார் அளித்துள்ளார்.
தற்போது அந்தக் காணொளி இணையத்தில் கசியவில்லை என்றும், பாதிக்கப்பட்ட பெண்ணுக்குச் சட்ட உதவி வழங்கப்படுவதாகவும் மைக்கல் சோங் தெரிவித்துள்ளார்.








