சிலாங்கூர் மாநிலத்தில் வெள்ளப் பாதிப்புகள் தொடர்ந்து அதிகரித்து வரும் நிலையில், வெள்ளத் தடுப்புத் திட்டங்களின் முன்னேற்றம் மற்றும் செயல்திறன் குறித்த விரிவான அறிக்கைகளை அரசாங்கம் வெளியிட வேண்டும் என கிள்ளான் நாடாளுமன்ற உறுப்பினர் வீ. கணபதிராவ் வலியுறுத்தியுள்ளார்.
இன்று மக்களவையில் எரிசக்தி மாற்றம் மற்றும் நீர் உருமாற்ற அமைச்சின் 2027ஆம் ஆண்டுக்கான வரவு செலவுத் திட்ட விவாதத்தில் பேசிய அவர், கிள்ளானில் தற்போது செயல்படுத்தப்பட்டு வரும் நான்கு வெள்ளத் தடுப்புத் திட்டங்களும் 2029ஆம் ஆண்டில் நிறைவடையத் திட்டமிடப்பட்டுள்ளதாகக் குறிப்பிட்டார்.
ஆனால், அவற்றின் பணிகள் வெறும் 1.21 விழுக்காடு முதல் 12.09 விழுக்காடு வரையிலேயே முன்னேறியுள்ளதாக அவர் சுட்டிக் காட்டினார்.
மேலும், திட்டங்களின் வெற்றியை ஒதுக்கப்பட்ட நிதியைக் கொண்டு மதிப்பிடாமல், வெள்ளப் பாதிப்புகள் உண்மையில் எந்த அளவுக்குக் குறைந்துள்ளன என்பதைக் கொண்டே மதிப்பிட வேண்டும் என்றார்.
இதற்கிடையில், நேற்று பெய்த கனமழையால் சிலாங்கூரின் நான்கு மாவட்டங்களில் 23 இடங்களில் திடீர் வெள்ளம் ஏற்பட்டது. கிள்ளான், கோம்பாக், கோலா சிலாங்கூர் மற்றும் பெட்டாலிங் ஆகிய பகுதிகள் பாதிக்கப்பட்டன என்பதையும் கணபதிராவ் சுட்டிக் காட்டினார்.








