ஜாலான் அம்பாங் பகுதியில் இம்மாத தொடக்கத்தில் நடந்த விபத்தில் இருவர் உயிரிழந்த சம்பவத்தில், தொடர்புடையதாக சந்தேகிக்கப்படும் நபர் மீது, நாளை இரு கொலைக் குற்றச்சாட்டுகள் சுமத்தப்படவுள்ளன.
24 வயதுடைய அந்த நபர் மீது குற்றவியல் சட்டம் பிரிவு 302-இன் கீழ், வழக்கு தொடரப்படவுள்ளதாக, கோலாலம்பூர் போக்குவரத்து அமலாக்க மற்றும் விசாரணைத் துறை தலைவர்முகமது ஜம்ஜூரி முகமது ஈசா தெரிவித்துள்ளார்.
மேலும், குற்றச்சாட்டு தொடர்பான விசாரணைக்காக, அவர் நாளை காலை 9 மணியளவில், கோலாலம்பூர் நீதிமன்றத்தில் ஆஜர்படுத்தப்பட உள்ளதாகவும் தெரிவிக்கப்பட்டுள்ளது.
கடந்த மே 2-ஆம் தேதி, அதிகாலை 5.30 மணியளவில் நடந்த இச்சம்பவத்தில், உயிரிழந்த துரைசிங்கம் ஆறுமுகம் மற்றும் மேனகா அர்ஜுனன் ஆகியோரின் மரணம் தொடர்பாக இந்த குற்றச்சாட்டுகள் பதிவு செய்யப்பட்டுள்ளது குறிப்பிடத்தக்கது.
