பேராக் மாநிலம், தெலுக் இந்தான், தாமான் பஞ்சார் ஜெயா பகுதியில் கடை ஒன்றின் முன்பாக 48 வயது ஆடவர் மூன்று பேரால் சரமாரியாக வெட்டிக் கொலை செய்யப்பட்டார்.
நேற்று நவம்பர் 3-ஆம் தேதி பிற்பகல் 3.53 மணியளவில் இச்சம்பவம் நிகழ்ந்ததாக ஹிலிர் பேராக் மாவட்ட போலீஸ் தலைவர் சுவா கோக் லியான் தெரிவித்துள்ளார்.
மேலும், சம்பவத்தின் போது வெட்டுக் கத்திகளுடன் வந்த மூன்று ஆடவர்கள் அந்த நபரைத் தாக்கியதாகக் கூறப்பட்டுள்ளது.
இந்நிலையில், பொதுமக்கள் அளித்த தகவலைத் தொடர்ந்து சம்பவ இடத்திற்கு விரைந்த போலீசார், படுகாயமடைந்த நபரை தெலுக் இந்தான் மருத்துவமனைக்குக் கொண்டு சென்றனர்.
எனினும், அவசர சிகிச்சைப் பிரிவில் அவர் உயிரிழந்ததாக மருத்துவ அதிகாரி உறுதிப்படுத்தியுள்ளார்.
இக்கொலைச் சம்பவம் தொடர்பான விசாரணைக்கு உதவும் வகையில் 27 வயது பெண் ஒருவர் கைது செய்யப்பட்டுள்ளதாக போலீசார் தெரிவித்துள்ளனர்.
