எஸ்பிஎம், எஸ்டிபிஎம் பொதுத் தேர்வுகளை எதிர்கொள்ளும் 8,690 மாணவர்களின் தமிழ்மொழித் திறனை மேம்படுத்த, மித்ரா 901,680 ரிங்கிட் நிதியை ஒதுக்கியுள்ளது.
மனிதவள அமைச்சின் கீழ் செயல்படும் மித்ரா, கல்வி அமைச்சுடன் இணைந்து இத்திட்டத்தை முன்னெடுக்கிறது. இதன் மூலம் 7,897 எஸ்பிஎம் மாணவர்களும் 793 எஸ்டிபிஎம் மாணவர்களும் பயனடைவார்கள். இந்திய மாணவர்களின் கல்வி வளர்ச்சிக்கு மடானி அரசாங்கம் தொடர்ந்து ஆதரவளித்து வருவதாக மனிதவள அமைச்சர் டத்தோஸ்ரீ ரமணன் ராமகிருஷ்ணன் தெரிவித்துள்ளார்.
இன்று பெட்டாலிங் ஜெயா, மெனாரா பிஏசியில் சிலாங்கூரைச் சேர்ந்த சுமார் 300 எஸ்பிஎம் மாணவர்கள் பங்கேற்ற தமிழ்மொழித் திறன் மேம்பாட்டுப் பட்டறையைத் தொடக்கி வைத்த பின்னர் செய்தியாளர்களிடம் பேசுகையில் அவர் இதனைத் தெரிவித்தார்.
மாணவர்கள் தமிழ்மொழிப் பாடத்தில் சிறந்த தேர்ச்சி பெறவும், பொதுத் தேர்வுகளைத் தன்னம்பிக்கையுடன் எதிர்கொள்ளவும் தேவையான கல்விசார் ஆதரவை வழங்குவதே இத்திட்டத்தின் நோக்கமாகும். தமிழ்மொழி என்பது தேர்வுக்கான பாடம் மட்டுமல்ல; அது மொழி, பண்பாடு மற்றும் அடையாளத்தின் முக்கிய அங்கம் என்றும் டத்தோ ஸ்ரீ ரமணன் வலியுறுத்தினார்.
கல்வி அமைச்சு மற்றும் மாநிலக் கல்வித் துறைகளுடன் இணைந்து இந்திய மாணவர்களின் கல்வி அடைவுகளை மேம்படுத்தும் நடவடிக்கைகளை மித்ரா தொடர்ந்து வலுப்படுத்தவுள்ளது என்றும் டத்தோ ஸ்ரீ ரமணன் தெரிவித்தார்.
இந்நிகழ்ச்சியில் கல்வித் துணை அமைச்சர் வோங் கா வோ, மித்ரா தலைமை இயக்குநர் கே. ரவீந்திரன் நாயர் உள்ளிட்ட அதிகாரிகளும் 50 கல்வியாளர்களும் கலந்து கொண்டனர்.
