நாடு முழுவதும் உள்ள டாக்சி, வாடகைக் கார் மற்றும் பள்ளிப் பேருந்து ஓட்டுநர்களுக்கு தலா 1,000 ரிங்கிட் சிறப்பு நிதியுதவி, தீபாவளிக்கு முன்பாக வழங்கி முடிக்கப்படும் என்று போக்குவரத்து அமைச்சர் அந்தோணி லோக் உறுதியளித்துள்ளார்.
புத்ராஜெயாவில் உள்ள போக்குவரத்து அமைச்சில் இன்று நடைபெற்ற நிதியுதவி வழங்கும் நிகழ்ச்சியில் பிரதமர் டத்தோ ஶ்ரீ அன்வார் இப்ராஹிம் முன்னிலையில் அவர் இதனைத் தெரிவித்தார்.
இந்த உதவியைப் பெறுவதற்கு ஓட்டுநர்கள் தனியாக விண்ணப்பிக்க வேண்டியதில்லை. செல்லுபடியாகும் பொதுச் சேவை வாகன ஓட்டுநர் உரிமமான பிஎஸ்வி வைத்திருக்கும் தகுதியான ஓட்டுநர்களின் விவரங்கள் அரசாங்கத் தரவுத்தளங்கள் மூலம் சரிபார்க்கப்பட்டு, நேரடியாகவோ வங்கிக் கணக்கில் பணம் செலுத்தியோ உதவி வழங்கப்படும்.
நாடு முழுவதும் 50,000க்கும் மேற்பட்ட ஓட்டுநர்கள் இந்த உதவியால் பயனடைவார்கள். முதல் கட்டமாக இன்று 500 ஓட்டுநர்களுக்கு நேரடியாக உதவி வழங்கப்பட்டது. மற்றவர்களுக்கான இந்த உதவித் தொகை கட்டம் கட்டமாக மேற்கொள்ளப்பட்டு, இரண்டு முதல் மூன்று வாரங்களுக்குள் நிறைவு செய்ய இலக்கு நிர்ணயிக்கப்பட்டுள்ளது என்று அந்தோணி லோக் விளக்கினார்.
சிறப்புத் தொடர் வாகனப் பதிவு எண்கள் விற்பனை மூலம் கிடைத்த 91 மில்லியன் ரிங்கிட் வருவாயிலிருந்து இந்த உதவிக்கான நிதி ஒதுக்கப்பட்டுள்ளது. 1,000 ரிங்கிட் சிறப்பு நிதியுதவி, எதிர்காலத்தில் அரசாங்கத்துக்குக் கிடைக்கும் கூடுதல் வருவாயைப் பொறுத்தே வழங்கப்படும் என்பதையும் அந்தோணி லோக் தெளிவுபடுத்தினார்.
