தமிழ்ப்பள்ளிகளில் பயிலும் B40 குடும்பங்களைச் சேர்ந்த 10 ஆயிரத்துக்கும் மேற்பட்ட மாணவர்களுக்கு, பாடங்களைப் புரிந்து கொள்வதற்கும் கல்வியில் முன்னேறுவதற்கும் உதவும் வகையில் கூடுதல் பயிற்சிகளும் மீட்டல் வகுப்புகளும் வழங்கப்பட்டுள்ளதாகத் துணைக் கல்வி அமைச்சர் வோங் கா வோ தெரிவித்தார்.
இன்று பெட்டாலிங் ஜெயா, மெனாரா பிஏசியில் நடைபெற்ற தமிழ்மொழித் திறன் மேம்பாட்டுப் பட்டறையில் கலந்து கொண்ட பின்னர் செய்தியாளர்களிடம் பேசிய அவர், தாய்மொழிக் கல்வியை மேம்படுத்துவதில் கல்வி அமைச்சு, மனிதவள அமைச்சு மற்றும் மித்ரா இணைந்து தொடர்ந்து செயல்படும் என்றும் உறுதியளித்தார்.
கடந்த ஜூலை மாதம் தொடங்கப்பட்ட கல்வி மடானி திட்டத்தின் கீழ் இந்த உதவிகள் வழங்கப்படுவதாகக் குறிப்பிட்ட அவர், மாணவர்களின் கல்வித் தேவைகளைப் பூர்த்தி செய்யும் இம்முயற்சிகள் தொடர்ந்து முன்னெடுக்கப்படும் என்றார்.
