சுங்கை பட்டாணி, நவம்பர்.30-
கோலா மூடா மாவட்ட காவற்படை, ஒரு பள்ளி விடுதியில் நடந்த மாணவர் துன்புறுத்தல் சம்பவம் குறித்த விசாரணையை முழுமையாக முடித்து விட்டது. இந்தச் சம்பவத்தில் ஒரு மாணவர் மயக்கமடைந்து கிடந்தது பெரும் பரபரப்பை ஏற்படுத்தியது. முன்னதாகக் கைது செய்யப்பட்டு காவலில் வைக்கப்பட்டிருந்த 16 வயது மாணவன், தற்போது வாய்மொழி காவற்படை ஜாமீனில் விடுவிக்கப்பட்டுள்ளான் என்று கோல மூடா, மாவட்ட காவல்துறைத் தலைவர் உதவி ஆணையர் ஹன்யான் ரம்லான் தெரிவித்துள்ளார்.
விசாரணை அறிக்கைகள் அனைத்தும் துணை அரசு வழக்கறிஞரிடம் சமர்ப்பிக்கப்பட்டு விட்டன. மேலும் அடுத்தகட்ட நடவடிக்கைக்காகப் சட்டத்துறைத் தலைவர் உத்தரவுக்காகக் காவற்படை காத்திருக்கிறது. விடுதியின் கழிவறையில் சக மாணவர்களால் தாக்கப்பட்டுக் கிடந்த மாணவன் மயக்கமடைந்த நிலையில் மீட்கப்பட்ட விவகாரத்தில், ஏற்கனவே நான்கு மாணவர்கள் விசாரணைக்காகக் கைது செய்யப்பட்டிருந்தனர் என்பது குறிப்பிடத்தக்கது.
