பினாங்கில் நிலவி வரும் கடும் வெயிலையும் பொருட்படுத்தாமல், உள்நாட்டு மற்றும் வெளிநாட்டுச் சுற்றுலாப் பயணிகள் பாரம்பரிய ரிக் ஷா பயணத்தில் அதீத ஆர்வம் காட்டி வருகின்றனர்.
யுனெஸ்கோ பாரம்பரிய நகரமான ஜார்ஜ் டவுனின் அழகிய வீதிகளைச் சுற்றிப் பார்க்க, ரிக் ஷாவே சிறந்த வழியாகத் திகழ்கிறது. "வெயில் சுட்டெரித்தாலும், ரிக் ஷா- வில் அமர்ந்து மெல்லிய காற்றை அனுபவித்தபடி நகரின் கலைநயமிக்க சுவரோவியங்களை ரசிப்பது தனி சுகம்," எனச் சுற்றுலாப் பயணிகள் உற்சாகத்துடன் தெரிவிக்கின்றனர்.
வெப்பம் காரணமாக ரிக் ஷா ஓட்டுநர்கள் குடைகளையும் தொப்பிகளையும் பயன்படுத்தினாலும், பயணிகளின் வருகை குறையாதது அவர்களுக்கு மகிழ்ச்சியைத் தந்துள்ளது. விடுமுறை காலம் என்பதால், காலை மற்றும் மாலை வேளைகளில் பயணிகள் கூட்டம் அலைமோதுவதாகவும், இதனால் வருமானம் விறுவிறுப்பாக இருப்பதாகவும் ஓட்டுநர்கள் கூறுகின்றனர்.
நவீன வாகனங்கள் பல வந்தாலும், பினாங்கின் குறுகிய வீதிகளில் மெதுவாக ஊர்ந்து செல்லும் இந்த 'விண்டேஜ்' ரிக் ஷாப் பயணம், வெயிலையும் தாண்டி இன்றும் தனது மவுசைத் தக்கவைத்துள்ளது.
