நாடாளுமன்றத்தில் கவிதை வடிவிலான பந்துன் பாடலில் சர்ச்சைக்குரிய வார்த்தையைப் பயன்படுத்தியதற்காக, பொதுப்பணித்துறை துணை அமைச்சர் டத்தோ ஶ்ரீ டாக்டர் அஹ்மாட் மஸ்லான், பிரதமர் டத்தோ ஸ்ரீ அன்வார் இப்ராஹிமிடம் மன்னிப்புக் கோரியுள்ளார்.
கடந்த திங்கட்கிழமை மக்களவைக் கூட்டத்தின்போது டோல் சாவடிக் கட்டணக் குறைப்பு தொடர்பான கேள்விகளுக்குப் பதிலளித்த அஹ்மாட் மஸ்லான், 'கென்சிங்’ என்ற மலாய் வார்த்தையைப் பயன்படுத்தியிருந்தார். இது ஏமாற்றப்படுவதைக் குறிக்கும் மலாய் சொல்லாடலாகும்.
இதையடுத்து, நவம்பர் 17ஆம் தேதியிட்ட கடிதம் மூலம் நாடாளுமன்றத்தில் தனது சொல்லாடல் தேர்வு பொருத்தமற்றது என்பதை ஒப்புக் கொண்ட அஹ்மாட் மஸ்லான், அந்த வார்த்தையைத் திரும்பப் பெற்றதுடன், அதற்குத் தார்மீகப் பொறுப்பேற்பதாகவும் தெரிவித்துள்ளார்.
மேலும், ஒற்றுமை அரசாங்கத்துடனும் பிரதமர் அன்வாரின் தலைமையுடனும் தமக்குள்ள ஆதரவு தொடர்ந்து நீடிக்கும் என்றும், அரசாங்கப் பிரதிநிதியாகத் தனது கடமைகளைப் பொறுப்புடன் நிறைவேற்றுவதாகவும் அவர் உறுதியளித்துள்ளார்.








