நேபாள வெள்ளத்தில் மாயமான 54 மலேசியர்களின் குடும்பங்களுக்கு ஆறு மாதக் கடன் தவணை ஒத்திவைப்பு வழங்கப்பட்டுள்ளது. எஸ்எஸ்பிசி, பப்ளிக் வங்கி ஆகியவை இதனை எழுத்துப்பூர்வமாக உறுதிப்படுத்தியுள்ளதாக, மலேசிய குடும்பங்களின் நம்பிக்கை அமைப்பான மஸ்ஃபியின் (MASFIH) ஒருங்கிணைப்பாளரும் பேச்சாளருமான டாக்டர் மணிவண்ணன் ரெத்தினம் தெரிவித்தார்.
அக்டோபர் 12ஆம் தேதி பேங்க் நெகாரா மலேசியாவுடன் நடத்திய பேச்சுவார்த்தைக்குப் பிறகு இந்த உறுதிப்பாடு கிடைத்ததாக அவர் கூறினார். மேலும் இரண்டு வங்கிகள் கடன் தவணைகளை ஒத்திவைக்கவும் அபராதங்களைத் தள்ளுபடி செய்யவும் முன்வந்துள்ளன. எனினும், வட்டியும் தள்ளுபடி செய்யப்படுமா என்பது இன்னும் உறுதிப்படுத்தப்படவில்லை.
“திரும்பி வராத தங்கள் அன்புக்குரியவர்களுக்காகக் குடும்பங்கள் காத்திருக்கும் நிலையில், கடன் தவணைகளும் மாதாந்திர நிதிப் பொறுப்புகளும் அவர்களுக்குச் சுமையாக உள்ளன” என்று டாக்டர் மணிவண்ணன் தெரிவித்தார்.
இதற்கிடையே, மாயமான 54 மலேசியர்களின் நிலையை உறுதிப்படுத்துவது, காப்புறுதி மற்றும் வங்கிக் கணக்குகள் தொடர்பான சட்டச் சிக்கல்களுக்குத் தீர்வு காண்பது ஆகியவற்றை ஒருங்கிணைக்க, பிரதமர் டத்தோ ஸ்ரீ அன்வார் இப்ராஹிமைச் சந்திக்க MASFIH மீண்டும் கோரிக்கை விடுத்துள்ளது. சட்டத்துறைத் தலைவர் அலுவலகத்துடனும் அவசரச் சந்திப்புக்கு அந்த அமைப்பு முயன்று வருகிறது.
“50 நாட்களாக நிச்சயமற்ற நிலை நீடிக்கிறது. குடும்பங்களுக்கு தெளிவான பதில்களும், நடைமுறையில் தெரியும் முன்னேற்றமும் அவசரமாகத் தேவை” என்று டாக்டர் மணிவண்ணன் வலியுறுத்தினார்.
