ஒவ்வொரு குழந்தைக்கும் பாதுகாப்பான, அச்சமற்ற பள்ளிச்சூழலில் கல்வி கற்கும் உரிமை இருப்பதாக மலேசிய மனித உரிமை ஆணையமான சுஹாகாமின் குழந்தைகள் நலன் பிரிவின் ஆணையர்கள் தெரிவித்துள்ளனர். 16 வயது மாணவி ஐரின் சோஃபியா பள்ளி வளாகத்தில் உயிரிழந்த சம்பவத்தைத் தொடர்ந்து இந்த வலியுறுத்தல் விடுக்கப்பட்டுள்ளது.
சுஹாகாம் குழந்தைகள் நலன் பிரிவின் தலைமை ஆணையர் டாக்டர் ஃபாரா நினி டுசுகி கூறுகையில் பள்ளிகளில் மாணவர் பாதுகாப்பு நடவடிக்கைகள் மேலும் தீவிரப்படுத்தப்பட வேண்டும் என்றும், கூடுதல் வகுப்புகள், இணைப்பாட நடவடிக்கைகள், விளையாட்டுப் பயிற்சிகள் மற்றும் பள்ளி நேரத்துக்குப் பிந்தைய நடவடிக்கைகளின்போதும் மாணவர்களின் இருப்பிடத்தை பள்ளி நிர்வாகம் கண்காணிக்க வேண்டும் என்றும் கூறியுள்ளார்.
மற்றொரு சுஹாகாம் ஆணையரான இணை பேராசிரியர் டாக்டர் முஹமட் அல்-அடிப் சமுரி கூறுகையில், பள்ளியில் இருக்கும் ஒவ்வொரு மாணவரும் எங்கே இருக்கிறார் என்பதை எந்த நேரத்திலும் பள்ளியால் உறுதிப்படுத்தக்கூடிய நடைமுறைகள் இருக்க வேண்டும் என்று வலியுறுத்தியுள்ளார். பாதுகாப்பு என்பது சிசிடிவி, வேலி மற்றும் பாதுகாவலர்களுடன் மட்டும் முடிந்துவிடக்கூடாது என்றும் அவர் தெரிவித்துள்ளார்.
இதனிடையே, ஐரின் சோஃபியா மரணம் தொடர்பான போலீஸ் விசாரணையை மதிக்க வேண்டும் என்றும், உறுதிப்படுத்தப்படாத தகவல்கள், ஊகங்கள் மற்றும் சமூக ஊடக குற்றச்சாட்டுகளைப் பரப்ப வேண்டாம் என்றும் சுஹாகாம் கேட்டுக் கொண்டுள்ளது.
