சுபாங் ஜெயா, SS18 குடியிருப்புப் பகுதியில், பட்டப்பகலில் கேபிள்களைத் திருட முயன்ற கும்பல் ஒன்று, பொதுமக்களின் துணிச்சலான எதிர்ப்பால் தப்பியோடிய சம்பவம் பெரும் பரபரப்பை ஏற்படுத்தியுள்ளது.
சமூக வலைதளங்களில் வைரலாகி வரும் 30 விநாடி காணொளியில், கம்பி வெட்டும் கருவியுடன் வந்த திருடர்கள், கேபிள்களைத் துண்டித்து வாகனங்களில் ஏற்ற முயல்வது தெரிகிறது. அப்போது அங்கிருந்த குடியிருப்பாளர் ஒருவர், "கேபிள் திருடர்கள்... கேபிள் திருடர்கள்..." என்று சத்தமிட்டு அவர்களை நோக்கிச் சென்றார்.
இதனால் அதிர்ச்சியடைந்த திருடர்கள், வெட்டப்பட்ட கேபிள்கள் மற்றும் கருவிகளுடன் தங்களது வாகனங்களில் ஏறி மின்னல் வேகத்தில் தப்பினர். அந்த நபர் திருடர்களின் வாகன எண்களையும் உரக்கக் கூறி பதிவு செய்துள்ளார்.
தற்போது சர்வதேச சந்தையில் தாமிரத்தின் விலை அதிகரித்து வருவதால், இத்தகைய திட்டமிட்ட கும்பல்கள் தொலைத்தொடர்பு மற்றும் மின்சாரக் கேபிள்களைக் குறிவைத்துத் திருடி வருகின்றன என்பது விசாரணையில் தெரியவந்துள்ளது.
