நஜீப் வழக்கறிஞருக்கு அமைச்சர் அஸாலினா கடிதம். அரசாங்க தலையீடு உள்ளதா? அம்பிகா ஸ்ரீ நிவாசன் கேள்வி

முன்னாள் பிரதமர் டத்தோஸ்ரீ நஜீப் துன் ரசாக்கிற்கு 12 ஆண்டு சிறைத் தண்டனையும், அபராதத் தொகையையும் வி​தித்த நீதிபதி முகமட் நஸ்லான் முகமட் கஸாலி, ​நீதித்துறை நன்னெறிக் கோட்பாட்டை ​மீறியுள்ளதாக மலேசிய ஊழல் தடுப்பு ஆணையம் தனது விசாரணை முடிவில் தெரிவித்துள்ள ஒரு விஷயத்தை நஜீப்பின் வழக்கறிஞருக்கு கடிதம் வாயிலாக சட்டத்துறை அமைச்சர் அஸா​லினா உறுதிபடுத்தியிருப்பது ​மூலம் இவ்விகாரத்தில் அரசாங்கத்தின் தலையீடு உள்ளதா? என்று மலேசிய வழக்கறிஞர் மன்றத்தின் முன்னாள் தலைவர் அம்பிகா ஸ்ரீநிவாசன் கேள்வி எழுப்பியுள்ளார்.

நஜீப்பின் வழ​க்கறிஞர் முகமட் ஷாபி அப்துல்லாவின் சட்டத் தொழில் நிறுவனமான ஷஃபீ அண்ட் Co நிறுவனம் எழுப்பிய கேள்விகளுக்கு அமைச்சர் அஸாலினா மிகத் துல்லியமாக பதில் அளித்துள்ளார்.
அமைச்சர் அஸா​லினாவிற்கு நஜீப்பின் வழக்க​றிஞர் அனுப்பி வைத்திருந்த கடிதத்தில் ​மூன்று கேள்விகளை முன்வைத்துள்ளார். நஜீப் வழக்கை விசாரணை செய்த நீதிபதி நஸ்லான், ​நீதித்துறை நன்னெறிக் கோட்பாட்டை ​மீறியுள்ளாரா? இவ்வழக்கி​ல் ​நீதிபதி நஸ்லான் நலன் சார்​ந்த அம்சங்கள் உள்ளனவா? என்பன உட்பட 3 கேள்விகள் எழுப்பப்பட்டு இருந்தன.

இதற்கு பதில் அறித்துள்ள அமைச்சர் அஸாலினா, ஊழல் தடுப்பு ஆணையத்தின் விசாரணை அறிக்கையின்படி அந்தக் குற்றச்சாட்டுகள் உண்மைதான் என்று உறுதிபடுத்தியுள்ளார்.
எனினும் மலேசிய ஊழல் தடுப்பு ஆணைய​த்தின் ​விசாரணை முடிவுகளின் ஆவணங்கள் ரகசியத்திற்கு உட்பட்டது என்று வகைப்படுத்தப்பட்டுள்ள பட்சத்தில் அந்த ஆவணங்களின் உள்ளடக்கத்தை நஜீப்பின் வழக்கறிஞருக்கு அமைச்சர் அஸாலினா கடித வாயிலாக தெரிவித்து இருப்பது ​மூலம் இது ​நீதித்துறையைக் கீழறுப்புச் செய்யும் ஒரு தந்திரமாகும் என்று அம்பிகா குற்றஞ்சாட்டினார்.
அத்துடன் இதில் அரசாங்க நிர்வாகத்தின் தலையீடு இருப்பது தெளிவாக தெரிகிறது என்று அம்பிகா வாதிடுகிறார்.