இம்மாதத் தொடக்கத்தில் சிப்பாங் அனைத்துலக சுற்றுப்பாதையில் நடைபெற்ற ஃபோர்முலா 1 பந்தயம் மூலம், மலேசியாவுக்கு சுமார் 950 மில்லியன் ரிங்கிட் பொருளாதாரப் பலன் கிடைத்துள்ளதாக இளைஞர் மற்றும் விளையாட்டுத் துறை அமைச்சு தெரிவித்துள்ளது.
கடந்த அக்டோபர் 2 முதல் 4ஆம் தேதி வரை நடைபெற்ற இப்பந்தயத்தைக் காண, வார இறுதி நாட்களில் சுமார் 2 லட்சத்து 61 ஆயிரம் பார்வையாளர்கள் வருகை தந்ததாகவும், அவர்களில் இறுதி பந்தய நாளில் மட்டும் சுமார் 1 லட்சத்து 3 ஆயிரம் பேர் கலந்து கொண்டதாகவும் அமைச்சு தெரிவித்துள்ளது.
இந்நிலையில், ஃபோர்முலா 1 நிர்வாகம் வழங்கிய தகவல்களின் அடிப்படையில், உலகம் முழுவதும் ஒளிபரப்பப்பட்ட இப்போட்டியை 827 மில்லியன் பார்வையாளர்கள் கண்டுகளித்ததாகவும் தெரிவிக்கப்பட்டுள்ளது.
மேலும், 97 ஆயிரத்திற்கும் அதிகமான நுழைவுச்சீட்டுகள் விற்பனை செய்யப்பட்டதுடன், 50 ஆயிரத்திற்கும் மேற்பட்ட வெளிநாட்டுச் சுற்றுலாப் பயணிகளும், சுமார் 5,000 வெளிநாட்டுத் தொழிலாளர்களும் இப்பந்தயத்தை முன்னிட்டு மலேசியாவுக்கு வந்ததாக அமைச்சு தெரிவித்துள்ளது.
இது குறித்து நாடாளுமன்றத்தில் நேற்று பத்தாங் சாடோங் நாடாளுமன்ற உறுப்பினர் ரோடியா சாப்பி எழுப்பிய கேள்விக்கு அமைச்சு எழுத்துப் பூர்வ பதிலளித்துள்ளது.
