கோலாலம்பூர், ஜாலான் கூச்சிங் பகுதியில் கடந்த சனிக்கிழமை பிற்பகல் ஆறு வாகனங்கள் மோதிக் கொண்ட விபத்தில், ஐந்து வயது சிறுமி அசியா அஹ்மாட் ஷாஹிர் உயிரிழந்த சம்பவம் தொடர்பாக, வங்கி அதிகாரியான 24 வயது ராவின் கோ மீது கோலாலம்பூர் மாஜிஸ்திரேட் நீதிமன்றத்தில் இன்று, மூன்று குற்றச்சாட்டுகள் சுமத்தப்பட்டன.
தனது மின்சார வாகனத்தைப் பொறுப்பற்ற முறையில் ஓட்டி சிறுமியின் மரணத்துக்குக் காரணமாக இருந்ததாக அவர் மீது குற்றம் சாட்டப்பட்டுள்ளது.
சாலைப் போக்குவரத்துச் சட்டம், பிரிவு 41(1)-இன் கீழ், குற்றம் நிரூபிக்கப்பட்டால் இரண்டு முதல் 10 ஆண்டுகள் வரை சிறைத்தண்டனை, 5,000 முதல் 20 ஆயிரம் ரிங்கிட் வரையில் அபராதமும் விதிக்கப்படலாம்.
அதேவேளையில், குறைந்தது மூன்று ஆண்டுகளுக்கு ஓட்டுநர் உரிமத்தைப் பயன்படுத்தத் தடை விதிக்கப்படலாம்.
எனினும், தன் மீதான குற்றச்சாட்டுகளை மறுத்த அவர் மேல் விசாரணை கோரினார்.
