பேராக் மாநிலத்தில் நாளை வியாழக்கிழமை அனைத்து பள்ளிகளும் வழக்கம்போல் செயல்படும் என்று மாநிலக் கல்வித் துறை இயக்குநர் ஸுல்கிஃப்லி முஹமட் மொக்தார் தெரிவித்துள்ளார்.
இன்று பிற்பகல் 2 மணி நிலவரப்படி, மாநிலத்தின் அனைத்து காற்றுத் தரக் கண்காணிப்பு நிலையங்களிலும் காற்றுத் தரக் குறியீடு 150-க்குக் கீழ் இருந்ததால், கல்வி அமைச்சின் கீழ் இயங்கும் கல்வி நிலையங்கள் தொடர்ந்து செயல்படலாம் என்று அவர் கூறினார்.
புகைமூட்ட நிலவரத்தை மாவட்டக் கல்வி அலுவலகங்களுடன் இணைந்து தொடர்ந்து கண்காணித்து வருவதாகவும், மாணவர்கள் மற்றும் கல்விப் பணியாளர்களின் பாதுகாப்பையும் சுகாதாரத்தையும் உறுதிப்படுத்த தேவையான நடவடிக்கைகள் எடுக்கப்படும் என்றும் அவர் தெரிவித்தார்.
பெற்றோர், மாநிலக் கல்வித் துறை வெளியிடும் அதிகாரப்பூர்வ அறிவிப்புகளைத் தொடர்ந்து கவனிக்குமாறும் அவர் கேட்டுக் கொண்டார்.
