சிலாங்கூர், கோலா லங்காட், பந்திங் பகுதியில், போதைப்பொருள் ஏற்படுத்திய மாயத்தோற்றத்தின் காரணமாக ஆடவர் ஒருவர் தனது தாயைக் கழுத்தை நெரித்துக் கொன்றிருக்கலாம் என போலீசார் சந்தேகிக்கின்றனர்.
கடந்த வெள்ளிக்கிழமை நண்பகல் சுமார் ஒரு மணியளவில், 50 வயதுகளைக் கடந்த பெண் ஒருவர் வீட்டில் உயிரிழந்து கிடப்பதாக போலீசாருக்குத் தகவல் கிடைத்தது.
இதையடுத்து, கொலைச் சந்தேகத்தின் பேரில் உயிரிழந்த பெண்ணின் 20 வயதுகளைக் கடந்த மகன் கைது செய்யப்பட்டார்.
அவரிடம் நடத்தப்பட்ட சிறுநீர் பரிசோதனையில் மெத்தாம்பெட்டமைன் எனும் போதைப்பொருள் பயன்படுத்தியிருப்பது உறுதிப்படுத்தப்பட்டதாக கோலா லங்காட் மாவட்ட போலீஸ் தலைவர் அக்மால்ரிஸால் ரட்ஸி தெரிவித்தார்.
சம்பவம் தொடர்பான விசாரணை தொடர்ந்து நடைபெற்று வருவதுடன், உயிரிழந்த பெண்ணின் உறவினர்களிடமும் வாக்குமூலங்கள் பெறப்பட்டு வருவதாக அவர் கூறினார்.
சந்தேக நபர் வரும் நவம்பர் 20ஆம் தேதி வரை ஏழு நாட்கள் போலீஸ் தடுப்புக் காவலில் வைக்கப்பட்டுள்ளார்.








